Deborah Qaunaq: Taimali, uvangauniaqpuq, pigiarunnaqsivunga.
Taimali uvanga taanna qaujimajara. Qulliq, qullikuluk qaumajjutituinnaq.
Qaumajjutituinnaunasukpalauqtuq. Taanna taqquti ikummaguti.
Taanna Alliq. Qulliq igliułłarmat, qulliq una alliq.
Amma tuqsuuk taaqtualuuvalaurmingmatik tuqsuungni qaumajjutiunasukpalauqtuq.
Taanna qaumajjutitainnaq sagvasisuungulaunngittuq.
Nattiullu, qilalugaullu, aiviullu uqsunganik immiqługu
kannguujaq ipaqqiqługu ikiłługu. Natirmulluunniit tuqsuungnulluunniit qaumajjutiuvalauqtuq.
Ikkuali angijuit qulliit niqłiurutaullutiglu uqquujjutaullutiglu
paniqsiijjutaullutiglu. Taannali taimaittuungittuq, qaumajjutituinnaq.
Nunami ukpigakuluit piruqtuvinirlaarjukuluit taqqutiułłaqpalauqput
ikittisiullutiglu. Nunamit kannguujaq suputi, manna ipararivalauqtanga.
Nunami qulliksaqtaqaułłarmingmat aqittunik.
Ujaratuinnaunngittuq Ukkusiksaq Aqirruaq.
Nunavut, nanituinnaq nunavut nunaraqangittuq.
Kisuksaqtalialuungmat, kisuksaqtalialuungmingmat makua
qullikkut. Aqirruarujuillu ujarait qiniqattaqsimanikualuungmata taikkua sivulliit.
Anaanaga, anaanagilauqtara qullinganik pitaqaqtugut.
Taimanna ukkusiksamik. Atullariktukuluulauqsimajuq.
Saattuujautinik manniliurutauvaktunik ipualingnik saattuujautinik
Sanaqattaliqtunga uqaqpaliqłungalu qallunamiqqai qaujijaugutta
sanajunnaqtuqaqtuugaluaq ai qulliksamik. Suli qullirmik aturama. Atuqattarama.
Qulliq, qaujjisigillugillu kiinaujaqsungittiaqłunilu
uunaqsitittijunnaqłunilu. Isumagijarali qaujjisigigakku
atuqpara suli. Makua piugigaluaqługit iglurjuami, igluralaanni
qulliqarama. Qaujjisigiluamulli uvanga suli atuqtara aniguijjutigisimagakku.